Summerplausch Fraue

Am Zistig, 9. Juli 2024 händ sich über 20 guet gluunti Fraue bi de Minigolfalag in Dietike versammlet. Mir händ eine vo de erste schöne Summertäg i dem Jahr verwütscht. Nach ere churze Begrüessig dur d Marlène simmer i altersdurchmischte Gruppe is Minigolfabentüür gstartet. Innerhalb vo de Gruppe, wo us jewiils 4 oder 5 Fraue bestande hät, hät mer sich gegesiitig agfüüred, d Ussicht gnosse und nebst em Spiele au einiges z’verzelle gha. Wer nöd grad am Spiele gsi isch, hät sich es Schatteplätzli gsuecht zum sich vor de Sunne schütze. Au wenns nöd bi allne Bahne rund gloffe isch, Spass häts trotzdem gmacht!

Nach de 18 absolvierte Bahne hämmer eus zerst mal en wohlverdiente Apéro gönnt. D Manuela und de Patrick Ehmann vo de Minigolfalag händ eus aschlüssend en feine Salatteller und Pommes serviert. Danke für die tolli Gastfründschaft.

Wie bi jedem Wettkampf häts au bim Minigolf e Siegerehrig geh. Als Siegerin hani nebst eme tolle Priis au s Schriebe vom Bricht dörfe überneh. 😉 Dicht gfolgt isch uf Platz 2 d Rahel. De dritti Platz händ sich d Tanja und d Marlène teilt. Herzlichi Gratulation! D Priise sind au das Jahr wieder vo de Mirjam gsponsered worde. Viele herzliche Dank!

Bi gmüetlichem Zämesii, Kafi und Glacé hämmer de Abig usklinge lah. A de agregte Gspröch hät sich wieder eimal meh zeigt, dass so en Alass und s gsellige Zämesii sehr gschätzt werdet. Danke Marlène fürs Organisiere vo dem tolle Abig.

Jasmin